"Huntu nos ta konstruí un sostenibilidat salú"
"Kuido optimal, sostenibel pa tur hende"
Pa mantené un ekilibrio entre naturalesa, kultura i ekonomia (Blue Destination) a futuro generashonnan na Boneiru tambe, Fundashon Mariadal (FM) su aspirashon ta pa redusí e peso riba medio ambiente i e dependensia di energia fósil i materia prima ku ta skars.
Fundashon Mariadal ta konsiente di e echo ku no ta solamente klima i medio ambiente tin impakto riba salú di hende, pero ku FM mes tambe tin impakto riba Boneiru su klima i medio ambiente.
Fundashon Mariadal ta un instituto pa kuido di salú na Boneiru, bou di kua e siguiente áreanan di atenshon ta kai: Kuido agudo, Kuido di durashon kòrtiku, Kuido di durashon largu, Diagnóstika i Suministro di remedi. For di aña 2010 Boneiru a bira un munisipio spesial di Hulanda. Banda di e kambio akí e espektativa ta ku kresementu di nos poblashon lo oumentá konsiderabelmente durante e añanan binidero. Konsekuensia di esaki ta ku Fundashon Mariadal lo sigui krese. FM ta bai hasi esfuerso pa ofresé e kresementu akí na un manera sostenibel na Boneiru.
Mishon
“Fundashon Mariadal lo brinda tur hende na Boneiru kuido médiko transmural profeshonal i optimal, kaminda pa medio di kolaborashon integrá entre kuido general i kuido spesialisá nos aspirashon lo ta pa yega na fasilidatnan di kuido ku ta sinkronisá ku otro. E kolaborashon akí ta enfoká prinsipalmente riba e islanan i paisnan rònt di nos, serka kua Boneiru ta obligá pa buska sosten. Normanan internashonal pa kuido di salú, adaptá na e situashon di Boneiru, ta para dilanti i lo determiná e direkshon.”
Vishon
“Tur hende tin derecho riba lo máksimo na kalidat integral di kuido ku por logra na Boneiru i ku ta sinkronisá ku e nesesidatnan i deseonan di e pashènt i su famia. Pa motibu ku Fundashon Mariadal ta e empresa mas grandi ku ta duna servisio den kuido di salú na nos isla, ta su tarea pa kontinuamente garantisá bienestar na Boneiru i pa sòru pa su personal por disponé di e konosementu, abilidatnan i medionan ku ta nesesario pa esaki.”
Pa organisá e kresementu di e añanan binidero den un forma sostenibel i pa optimalisá e kuido eksistente, FM ta hasi uso di kuadronan di maneho (internashonal) pa hinka su programa di mas aña den otro:
- WHO Sustainability goals1
- GREENDEAL Zorg 3.0
- Blue Destination – Entidat Públiko Boneiru
- International Civil Aviation Athourity (ICAO)
- Airport Council International (ACI)
Sostenibilidat i resiliensia ta un parti di e FM – Corporate Strategic Plan (CSP). Hunta di Direktiva ta duna empleadonan den e organisashon mandato pa via un grupo di trabou duna kontenido na ehekushon di e programa di mas aña.
FM ta buska kolaborashon stratégiko ku e ministerionan di Reino Hulandes. FM ta hiba un maneho aktivo den inisiamentu di kolaborashon i konstrukshon di Aliansa ku organisashonnan (internashonal) di e sektor (kadena). ANNEX 1 ta ofresé un bista general di fuentenan di konosementu ku a usa. ANNEX 2 ta ofresé un bista general di e stakeholdernan enbolbí. Ku algun di e stakeholdernan di mas importante a formulá e ambishonnan den un Letter of Intent (LoI).
1. Pa FM sostenibilisashon di kuido / kuido sostenibel ta nifiká: teniendo kuenta ku legislashon i regulashon, enfoká riba kuido ku impakto mas abou posibel riba klima, medio ambiente i ambiente di biba. Esaki ta pidi pa ‘kuido bèrdè i neutral for di un punto di bista klimatológiko’ ku emishon minimal di gas invernadero i un impakto minimal riba nos ambiente di biba, suministrá ku bista pa uso ekonómiko i sirkular di materia prima i material.
2. FM ke desaroyá ophetivonan (intermedio) konkreto, kuantifikabel i mará na tempu, di manera ku ta realisá sostenibilisashon di kuido ku impakto minimal riba klima i medio ambiente na aña 2050.
- Redukshon di 55% di CO2 na aña 2030 i nuetralidat klimatológiko na aña 2050, manera inkluí den e Akuerdo di Koalishon Rutte-IV;
- 50% ménos uso di materia prima abiótiko primario na aña 2023 i traha 100% sirkular na aña 2050.
3. FM ta institushonalisá un método i alkanse ku por midi pa yega na sostenibilisashon. E método i alkanse akí ta konsistí di:
- Delimitashon; E deklarashon di maneho akí ta ofresé e posibilidat pa proba enbolbimentu riba nivel ehekutivo, oumentá importansia di sostenibilidat i efisiensia di energia i desaroyá e kuadro pa kumpli ku e eksigensianan di e programa. Mester formulá e deklarashon di maneho di tal manera ku esaki ta konektá na e mihó manera ku e nesesidatnan general di Fundashon Mariadal.
- Redukshon: E ophetivo ta relashoná ku emishon general i ta enserá e norma pa mehorashon di emishon (esta: ophetivo apsoluto òf di intensidat). FM ta selektá un aña básiko pa e ophetivo. FM ta mustra esfuersonan ku tin sentido pa redusí su emishonnan di akuerdo ku e ophetivo ku el a formulá i ku e deklarashon di maneho. FM ta entregá prueba pa proba ku ta ehekutá e plan efektivamente.
- Optimalisashon: E ophetivo ta enserá emishon spesífiko, esaki pa kuido di salú i tur forma di mobilidat na tera i den aire. E plan tin ku demostrá ku FM ta hiba un diálogo kontinuo, ta kompartí e mihó práktikanan, ta duna kapasitashon, ta desaroyá proyektonan konhunto i ta promové kolaborashon ku e stakeholdernan di mas importante na Boneiru.
- Neutralidat: kompensá kompranan di FM i entregá material di prueba pa kubri tantu emishon residual komo emishon di biahe di negoshi di personal ku no por keda redusí den otro forma.
FM ta determiná límitenan operashonal di emishon direkto i índirekto di aktividatnan a base di límitenan di e organisashon stipulá di parti di FM.
Scope 1: Emishon direkto ku ta surgi for di fuentenan ku ta propiedat di i/òf ku FM ta kontrolá, por ehèmpel emishon na momentu di kimamentu di kombustibel den propio avion, vehíkulo etc. òf avion, vehíkulo etc. ku ta bou di kontròl di FM.
Scope 2: Emishon índirekto for di generashon di koriente, stom, kayente òf friamentu ku FM ta usa. Ta haña emishon di Scope 2 físikamente den e fasilidat kaminda ta generá koriente kumprá.
Scope 3: Tur otro emishon índirekto ku ta konsekuensia di aktividat di FM, pero ku ta prosedente di fuentenan ku no ta propiedat di i/òf ku no ta bou di kontròl di FM (por ehèmpel buelo di avion di air ambulance, vehíkulo i aparato ku terseranan ta eksplotá, maneho eksterno di shushi etc.).
2 Programa di mas aña
Pa henter e kadena di kuido ta di importansia pa mas tantu posibel sòru pa hende ta salú i ta keda salú. Esaki pasobra e forma mas sostenibel di kuido, ta kuido ku no tin mester di duna. Mas enfoke riba prevenshon di malesa, riba promoshon di salú i un estilo di biba salú, riba un ambiente di kuido i biba salú i mas enfoke riba kontròl di malesa, lo kondusí na mas aña di bida salú i redukshon di uso di kuido. Esaki ta spar gastu, tempu i uso di hende i material i pues ta bon pa medio ambiente tambe. Pa e motibu akí partidonan ta pone komo meta pa nan mes:
- Den un forma komprobabel i a base di konosementu i konseptonan eksistente FM ta komprometé su mes ku promoshon di salú físiko i mental di e poblashon, pashèntnan/klientenan í di nan empleadonan (e departamento di Rekurso Humano a desaroyá maneho den kuadro di empleabilidat sostenibel) i ta kontribuí aktivamente na programanan i konsientisashon di esaki.
- Alimentashon salú, variá i sostenibel pa klientenan/pashèntnan i (kaminda esaki ta aplikabel, manera den kantina di trabou) pa empleadonan. Pa esaki proveedornan di kuido ta hasi ‘alimentashon sostenibel i salú’ un parti di nan maneho di kompra.
- Alimentashon ku mas proteina vegetal i ménos proteina di bestia mayoria biaha ta mas sostenibel. Pa e oferta di alimentashon pa personal i bishitantenan, proveedornan di kuido ta boga pa un proporshon di 40/60 di proteina di bestia/vegetal pa mas tardá na aña 2023, ku un proporshon di 50/50 komo resultado intermedio na aña 2026. Pa pashènt i habitante a elaborá un maneho di alimentashon.
- Proveedornan di kuido ta apliká konosementu i eksperensia nobo i eksistente pa loke ta trata un ambiente di biba i traha ku ta promové salú den i rònt di nan ubikashonnan di kuido, sigur tambe den kaso di (re)konstrukshon nobo. Tambe nan ta amplia e konosementu akí mas aleu i nan ta kompartí bon ehèmpel mutuamente.
Ankramentu i realisashon sostenibel tin mester di konsiensia, konosementu, abilidat, investigashon i kolaborashon. Ta nesesario pa tur empleado den FM ta disponé di informashon tokante e relashon entre aktuashon humano, klima, medio ambiente i salú.
- FM ta kontribuí aktivamente na e debate sosial tokante e relashon entre aktuashon humano, kambio di klima i kontaminashon di medio ambiente, un ambiente di biba salú i salubridat.
- FM ta inkluí (e importansia di) prevenshon, kuido sostenibel i e relashon entre klima, medio ambiente i salubridat integralmente i visíbelmente den nan dokumentunan di strategia i vishon.
- FM ta forma un tim ku ta okupá su mes ku konsientisashon di empleadonan tokante sostenibilidat i e relashon entre kambio di klima i salubridat.
- FM ta desaroyá un strategia di komunikashon konkreto pa trese e metanan i palabrashonnan padilanti, ku den esaki atenshon spesial pa informashon den direkshon di pashènt/kliente i e empleadonan.
- FM ta promové inkorporashon integral di kuido sostenibel den kuríkulo di tur formashon di kuido na FMA. Ta palabrá ku FMA kon ta inkluí e temanan akí strukturalmente (mas mihó) den e formashonnan di kuido.
Pa loke ta trata sostenibilisashon di entre otro edifisio, energia i mobilidat, FM ta pone komo meta pa yega na 55% ménos emishon di CO2 direkto na aña 2023 i nuetralidat klimatológiko na aña 2050.
- FM ta aspirá pa yega na un promedio di redukshon di 30% di CO2 pa bienes inmóbil i energia na fin di aña 2026 a base di ‘roadmaps’ pa monitoreo sektoral.
- Entrante aña 2023 FM ta identifiká e emishon di CO2 di moveshonnan di transporte di personal, vehíkulonan di trabou, mishonnan di air ambulance i FM ta formulá un plan di mobilidat ku e metanan i medidanan pa redukshon di e emishon di CO2 akí i pa sostenibilisashon di e movementunan di transporte akí. Kaminda ta posibel FM ta enbolbí e moveshonnan di transporte di su pashèntnan i bishitantenan.
- FM ta tuma neutralidat klimatológiko i/òf ‘CO2 di konsentrashon abou’ komo punto di salida na momentu di konstrukshon nobo of rekonstrukshon i den kaso di kompra di energia i medionan di mobilidat. Den esaki FM ta traha huntu ku WEB NV i kompanianan di ‘lease’ outo.
- FM ta tuma inisiativa relashoná ku IT i suministradónan di aplikashon pa riba tereno di energia konfigurá mas ekonómiko posibel i ku enfoke riba un futuro CO2 neutral. Den esaki FM ta pensa riba:
- Infrastruktura di IT ku ta efisiente riba tereno di energia inkluso monitoreo i raportahe, i ‘lever dashboards’ kaminda por mira kua impakto e aplikashon tin riba energia.
- Pone aplikashon den datacenter bèrdè, pidi prueba i intenshon di e datacenternan tokante kua akshon nan a òf ta bai tuma.
- Konsolidashon i virtualisashon di server.
- Optimalisashon di software, minimalisashon di fuente di sistema, adapatashon di forsa di prosesamentu den oranan ku ta ménos drùk.
- Kompreshon di data i deduplikashon di data, redukshon di nesesidat di almasenamentu.
- Traha den forma ‘remote’, mehorá aksesibilidat, kolaborashon i komunikashon.
- Sosten di parti di e suministradó di inisiativanan bèrdè (traha sin papel, resiklahe, fakturashon digital).
Gustosamente FM ke anda den forma responsabel ku materia prima pa realisashon di un mundu mas limpi i mas salú pa e generashon aktual i generashonnan di futuro. For di e punto di bista di kontinuidat di kuido tambe esaki ta di importansia. Pa e motibu akí kambia di direkshon for di ‘tira afó’ pa ‘reuso’ i preferibelmente redukshon di uso ta nesesario. FM ta pone komo meta: 50% ménos uso básiko di materia prima na aña 2030 i kuido sirkular máksimo na aña 2050.
- Fm ta apliká konosementu, eksperensia i posibilidatnan eksistente pa traha sirkular i anda ekonómikamente ku materia prima. Pa esaki FM ta oumentá e konosementu ku tin disponibel tokante esaki i ta promové desaroyo di konosementu nobo.
- Kaminda ta posibel FM ta skohe pa ‘reusabel’ na lugá di ‘desechabel’ i su ambishon ta pa na aña 2026 por lo ménos 20% di e medionan (médiko) ta reusabel. Pa logra esaki partidonan ta promové kòmbersashon entre usuarionan, produktornan i esunnan ku ta hasi e kompranan. Seguronan di kuido i ofisinanan di kuido ta wak kon via palabrashon den kòntrakt nan por stimulá proveedornan di kuido positivamente pa yega na reuso.
- FM i su suministradónan ta stipulá ‘hasi kompra den forma sostenibel i sirkular’ komo punto di salida den e maneho di kompra pa loke ta trata material (di konstrukshon), medionan (médiko) i alimentashon, i kaminda ta posibel ta kumpra konhuntamente pa stimulá e demanda di merkado pa esaki i ku esei promové desaroyo di alternativanan sostenibel pa Boneiru.
- FM ta aspirá pa na aña 2030 maksimalmente 25% di tur shushi ta ‘restu di shushi no separá’. E aspirashon ta alabes ku na aña 2026 ya kaba tin 25% ménos restu di shushi no separá. Pa logra esaki FM ta promové maneho di shushi ku atenshon pa separashon di shushi i ‘zero waste’, ta stimulá konosementu tokante esaki serka empleadonan i ta enfoká riba un mihó kolaborashon den kadena pa yega na un situashon optimal.
- Strukturalmente FM ta identifiká dispidimentu di kuminda den kuido i ta hasi su máksimo esfuerso pa redusí esaki.
Remedi ta duna un aporte balioso na funshonamentu diario di hopi hende, na kalidat di bida i na prevenshon i sanashon di malesa. Sinembargo pa medio di uso di remedi, via pishi i pupu, restu di remedi tambe ta resultá den awa bou di suela i awa di dam etc., ku daño na medio ambiente i ambiente di biba komo konsekuensia. Banda di esaki te ainda por sosodé ku hende ta flùsh remedi (líkido) no usá den baki di laba tayó òf den tualèt i di e manera akí esaki ta resultá den awa bou di suela òf den awa di dam etc. Produkshon di remedi tambe tin un impakto riba klima i medio ambiente. TM ta pone komo meta: redukshon di peso riba medio ambiente kousá pa (uso di) remedi.
- FM ta promové salú mediante prevenshon di uso innesesario i kombatimentu di dispidimentu, pa medio di 1) preskripshon i suministro di e kantidat nèt di e remedinan nesesario i 2) promoshon di kumplimentu ku terapia i uso korekto di parti di e pashènt.
- FM ta desaroyá un aserkamentu ku medida pa kombatí dispidimentu di remedi, por ehèmpel komo konsekuensia di preskripshon innesesario, suministro di mas òf dósisnan innesesariamente haltu.
ANEKSO 2
Stakeholdernan enbolbí dentro di e strategia di sostenibilisashon:
- Stinapa
- Water en Energie Bedrijf
- Bonaire International Airport
- Kamer van Koophandel
- Dutch Caribbean Cooperation Airports