Laboratorio FM ta un laboratorio moderno di hòspital ku ta ehekutá tèst médiko di laboratorio pa Fundashon Mariadal i otro dunadónan di kuido na Boneiru. Pa esaki e laboratorio ta hasi uso di aparatonan ultramoderno i personal bon kapasitá.
Pashènt i dunadónan di kuido na Boneiru ta nos promé prioridat. Nan tin derecho riba diagnóstika di laboratorio riba nivel hulandes ku un tempu entre entrega i resultado ku ta komparabel ku Hulanda, teniendo kuenta ku e situashon spesial (geográfiko) di Boneiru. E laboratorio ta ofresé diagnóstika di kalidat haltu kaminda e aspirashon ta pa hasi esaki ku gastu mas abou posibel.
E laboratorio ta hunga un ròl indispensabel den kuido di salú públiko (preventivo) na Boneiru i aktivamente ta buska posibilidatnan pa ehekutá mas tantu petishon posibel nan mes, pa yega na un servisio ku kontinuamente ta den mehorashon pa pashèntnan i dunadónan di kuido den i pafó di Fundashon Mariadal, kaminda ta mira e laboratorio komo un funshon ku ta agregá balor dentro di Fundashon Mariadal.
Ta ofresé empleadonan un ambiente di trabou seif, inklusivo i inspirativo ku espasio pa desaroyo personal. Nan mester sinti nan mes liber pa hasi sugerensia òf ekspresá keho.
E laboratorio ta ehekutá e análisisnan bou di akreditashon di e Hunta pa Akreditashon bou di e number di registrashon M303 conform ISO 15189-2012.
Pashènt:
Laboratorio FM ta hasi tèst di laboratorio pa Fundashon Mariadal i otro dunadónan di kuido na Boneiru. Bo dunadó di kuido ta determiná kua tèst mester hasi.
Kiko bo ta bai laboratorio kuné?
1) E formulario di petishon:
E formulario akí mester tin riba dje:
- Steker di pashènt (por haña esaki na bali di registrashon di e sitio di hasi tèst)
- Detayenan tokante e petishon, manera: e tèst ku ta deseá, nòmber di e persona ku ta hasi petishon, fecha i eventual informashonnan klíniko
2) Prueba di identidat (pasport, sédula òf reibeweis)
3) Otro material:
Si bo ta entregá material, riba kada pòchi ku muestra mester tin bo nòmber, fecha di nasementu, sekso i e fecha di hasi tèst.
Nota: E laboratorio por duna bo material i informashon ku bo tin mester pa eventual otro tèst.
Mi mester ta na yuna?
Si bo mester ta na yuna riba e dia di hasi tèst, riba e anochi promé ku e tèst for di 23.00 or bo no tin mag di kome ni bebe nada. Ta pèrmití solamente pa bo bebe awa òf te, sin lechi i sin suku. Bo no tin mag di bebe kòfi, ni lechi, ni limonada. Te 10.30 or por hasi e tèstnan pa kua bo mester ta na yuna.
Ki ora mi por bai laboratorio?
Laboratorio ta habrí riba dianan di trabou for di 6.30 or te 15.00 or. En general despues di 10.00 or ta mas trankil.
Na unda mi mester ta?
Bo por alkansá e laboratorio di prek sanger via e entrada prinsipal i despues drenta mesora e hanchi na man robes. Seguidamente e laboratorio di prek sanger ta den e promé hanchi na man drechi; den Edifisio C. E empleadonan ku ta para na entrada prinsipal por yuda bo si bo ta deseá esaki.
Kontakto: (+599) 715-8900 ekstenshon 1610
Mi tin ku paga?
ZJCN ta paga mayoria diagnóstika si bo ta sigurá na ZJCN. Si bo no ta sigurá na ZJCN, bo tin ku paga e gastunan adelantá na resepshon.
Uso adishonal di material korporal
Ta tuma material korporal pa finnan diagnóstiko i terapéutiko. Por usa material korporal ku sobra despues di análisis pa finnan sientífiko. Esaki ta sosodé den un forma anónimo, esaki ta nifiká ku no por haña sa mas di ken e material ta prosedente. Si di bo parti tin opheshon kontra uso adishonal di bo material korporal, bo por mèldu esaki ora nan ta tuma e material. E ora ei riba e tubunan den kua e material ta bai, nan ta plak etiketa ku e teksto: No usa pa otro finnan. Kada biaha ku nan tuma material òf kada biaha ku bo entregá material bo tin ku hasi opheshon di nobo.
Dunadó di kuido:
Informashon pa e personanan ku ta hasi petishon:
Sòru pa bo duna e pashènt un formulario kompletamente yená bai kuné. Riba e formulario di petishon mester tin:
- Nòmber kompleto (fam i inisialnan)
- Fecha di nasementu
- Adrès
- Nòmber di esun ku ta hasi e petishon
- Tèstnan deseá
- Nòmber di esun ku a tuma e material ku fecha i ora, kaminda esaki ta aplikabel
Preferibelmente ta hasi uso di un steker di pashènt riba e formulario di petishon.
Kriterionan di akseptashon pa investigashon di laboratorio:
Laboratorio ta aspirá koutela na momentu di entregá resultado. Esaki ta nifiká ku e material mester yega laboratorio den e kondishonnan korekto. Ta sosodé ku ta entregá material ku no ta adekuá pa e tèst ku a pidi òf ku no por determiná kiko a pidi pa kua pashènt.
Pa e motibu akí por fabor tene kuenta ku lo siguiente:
- Material inkorekto di tèst (wak e formulario ‘sekuensia di tubu pa tèst’)
- Material no ta sufisiente
- Material inkorekto òf no-identifiká
- Kontenedó korekto di muestra (pòchi, tubu etc.)
- Evitá kontenedó di muestra ku ta lèk òf ku ta shushi
- No ta aseptá material steril di mas ku 48 ora bieu (pa investigashon mikrobiológiko)
- No por tuma material sin formulario di petishon den tratamentu
Petishonnan adishonal:
Komo e persona ku ta hasi e petishon bo por supliká laboratorio via telefòn pa hasi tèst adishonal for di material ku a tuma for di pashènt anteriormente. Si tin sufisiente material ta kumpli ku e petishon akí, si e término di warda i e kondishonnan di warda ta pèrmití esaki.
Petishon pafó di ora di ofisina:
Den kaso di petishon pa Kímika Klíniko pafó di ora di trabou durante dia (7.00 or – 15.30 or) por ehekutá análisisnan ku ta kai pafó di e pakete di cito solamente despues di pèrmit di e kímiko klíniko.
Den kaso di petishon pa Mikrobiologia Médiko pafó di ora di trabou durante dia (7.00 or – 15.30 or) e persona ku ta hasi petishon tin ku tuma kontakto ku e médiko-mikrobiólogo ku ta na warda.
Prek sanger pa investigashon cito (ku urgensia)
Riba e formulario di petishon bo tin ku indiká bon kla ku ta trata di un investigashon ku urgensia (cito). Solamente investigashonnan ku ta pertenesé na e pakete di investigashon cito (indiká esaki riba e formulario di petishon) por pidi ku urgensia. Ta trata e investigashon cito ku preferensia. E resultadonan di e investigashon cito ta disponibel dentro di 60 minüt despues di a risibi e petishon na laboratorio. Ta manda a resultado via fax pa bo i bo ta haña un yamada.
