Fundashon Mariadal dentro di poko ta bai amplia su Hunta di Direktiva ku reklutashon di un Direktor pa e parti Operashonal i Finansa i un Direktor pa Kuido Médiko. E ampliashon ta nesesario pa motibu di kresementu di e organisashon i e komplehidat kresiente di e pakete di kuido.
Boneiru a eksperensiá un kresementu fuerte di su poblashon. Habitantenan ta biba mas largu i tin kestion di enbehesimentu (vergrijzing), di manera ku e demanda pa bon kuido tambe a oumentá. Fundashon Mariadal tambe a krese huntu ku esaki, tantu pa loke ta trata e pakete di kuido komo e kantidat di empleado. E kantidat di spesialismo médiko ku Fundashon Mariadal ta ofresé a oumentá konsiderabelmente for di 10-10-2010. Nos organisashon tin ambishonnan haltu i diariamente nos empleadonan ta traha ku dedikashon pa duna kuido na komunidat di Boneiru.
Ku bista riba Boneiru su futuro desaroyo i mirando e echo ku kuido médiko ta un parti importante di bienestar di nos komunidat, a skohe awor pa un Hunta di Direktiva ku ta konsistí di mas miembro. Ora ku yena e funshonnan akí, e Hunta di Direktiva ta konsistí di un Direktor pa Asuntunan General, awor akí drs Giovanni J.M. Frans, médiko ku MBA-Health, un Direktor pa e parti Operashonal i Finansa i un Direktor pa Kuido Médiko. Fundashon Mariadal ta sigui desaroyá su mes kontinuamente ku e meta pa ofresé komunidat di Boneiru un kuido di e kalidat di mas haltu den e sentido mas amplio di palabra.
Dentro di poko e vakaturanan ta sali pa e dos funshonnan di Direktor den korantnan lokal i otro medionan di komunikashon. Ku esaki Fundashon Mariadal ta spera di atraé kandidatonan kapasitá i motivá pa e funshonnan desafiante i bunita akí.
Huntu nos ta sigui traha riba un kuido ku enfoke riba futuro i di kalidat haltu pa Boneiru!