Traha den kuido di salú ta bo ambishon? Bo gusta traha ku i pa hende i bo ta interesá den nan salú? E ora ei sigui lesa akinan tokante e Formashon Básiko pa Enfermera(o) na FM Academy.
E formashon pa ‘ziekenverzorgende’ ku ta dura tres aña ta keda karakterisá pa un kuríkulo ku ta kompletamente sinkronisá ku e práktika di hòspital. E lèsnan ta tuma lugá na FM Academy i nan ta na enkargo di nos propio dosentenan, profeshonalnan di hòspital i profeshonalnan pa e materianan di sosten. E parti práktiko bo ta hasi entre otro na Kuido na Kas (Thuiszorg) i Kas di Kuido, pero tambe na kuido di hende ku limitashon i kuido despues di parto. Di e manera akí teoria i práktika ta konektá optimalmente ku otro. I pa motibu ku rápidamente kaba bo ta sera konosí ku práktika, bo sa mesora si e profeshon ta pas di bèrdat serka bo.
E formashon akí ta un variante di traha-siña. Esaki ta nifiká ku bo ta sera un akuerdo di siña i traha ku FM Academy pa durashon di bo formashon. Ta interkambiá un siman di teoria ku 3 pa 4 siman di kore stazje den práktika. Bo ta kore stazje i bo ta traha 24 ora pa siman. Bo ta haña guia di ‘ziekenverzorgende-nan’ òf enfermera(o)nan di e departamento kaminda bo ta kore stazje. Tambe tin un mèntòr konektá na bo trayekto di siña i traha, ku ta yuda guia bo proseso di siña.
E formashon básiko pa ‘ziekenverzorgende’ ta kuminsá kada aña eskolar na luna di sèptèmber. Si bo ta interesá den e formashon pa ‘ziekenverzorgende’, e ora ei bo por solisitá/registrá for di luna di desèmber pa un lugá den e grupo ku ta kuminsá na luna di sèptèmber.
Bo ke sa mas tokante e formashon pa ‘ziekenverzorgende’ na FM Academy? E ora ei klek akinan pa un grabashon (un dosente na palabra) i download e foyeto ‘Opleiding Ziekenverzorgende Niveau 4 – Formashon pa ‘Ziekenverzorgende’ nivel 4’. Akí den tin mas informashon tokante struktura, parti práktiko, sitio di trabou den futuro, diploma, etc.
Atmishon
Pa bini na remarke pa e Formashon Básiko pa Enfermera(o), bo ta kumpli ku e siguiente eksigensianan:
- Un edat minimal di 16 aña
- Bo ta den poseshon di un diploma PKL òf un diploma ‘helpende’ den kuido (MBO nivel 2)
- Pidi un Deklarashon Tokante Kondukta (VOG)
- Bo por kumpli ku e obligashon finansiero anual pa gastu di e estudio i di buki
- Bo tin un akuerdo firmá di siña i traha
Inskripshon
Si bo ta interesá den e formashon pa ‘ziekenverzorgende’, e ora ei bo por registrá via e formulario di inskripshon.