Nos kuido di salú den desaroyo
Fundashon Mariadal Academy (FM Academy) ta ofresé formashon pa profeshon, kapasitashon i entrenamentu pa kuido di salú. Pa medio di invertí den konosementu di nos hendenan nos ta edifikando nos propio kuido di salú pa i di Boneiru. Pa medio di tuma kapasitashon di profeshonalnan den kuido den nos propio man, nos ta alsa kalidat i sostenibilidat di kuido di salú na nos isla.
Na promé lugá FM Academy ta proveé den demanda di formashon di Fundashon Mariadal. Banda di esaki nos ta ofresé kapasitashon relashoná ku kuido pa otro organisashonnan i institutonan sosial. Riba nivel regional nos ta sinkronisá nos oferta di formashon ku institutonan di kuido i sentronan di formashon na Aruba, Kòrsou, St. Maarten, Saba i St. Eustatius.
Formashon MBO ku ta fortifiká prestashon
Na luna di sèptèmber 2006 FM Academy a ranka sali ofisialmente ku formashon den forma sentral di studiantenan pa enfermeria (verpleegkundigen / ziekenverzorgenden) pa kuido di salú. Un kolaborashon ku Instituto pa Formashon den Enfermeria (I.F.E.) di Kòrsou a hasi posibel pa nos mes duna formashon na nos studiantenan na Boneiru pa ‘Verzorgende Niveau 3’ i ‘Verpleegkundige Niveau 4’.
Na aña 2011 FM Academy a drenta den un kolaborashon estrecho ku ROC-Top na Hulanda. ROC Top (Regionaal Onderwijs Centrum: Theorie ontmoet praktijk – Sentro Regional pa Enseñansa: Teoria ta topa práktika) ta para pa formashon MBO riba eskala chikitu ku espasio pa atenshon personal. Ta ofresé e formashonnan nivel 3 i nivel 4 di FM Academy a base di e plan di formashon di ROC-Top.
Pa FM Academy e kolaborashon akí ta nifiká ku e sistema di enseñansa for di aña 2016 a pasa over di modular pa e struktura mas nobo di kualifikashon (HKS). Aunke e kolaborashon ku ROC Top ta kontinuá ketu bai, for di meimei di aña 2018 FM Academy ta ofresé e formashonnan di MBO nivel 3 i nivel 4 kompletamente riba propio nòmber.
Den e struktura di kualifikashon pa nos formashonnan, un fail di kualifikashon ta konsistí di un parti básiko i vários parti di profil. Un parti básiko i un parti di profil huntu ta forma e kualifikashon. Partinan di eskoho ta e ‘plùs’ riba e kualifikashon i ta kompletá e formashon.
Tokante enseñansa i kresementu
FM Academy ke duna un aporte aktivo na desaroyo i kuido di salú sostenibel na Boneiru. Pa e motibu akí profeshonalisashon di empleado, inovashon den desaroyo di enseñansa i inovashon di e oferta di formashon tin nos atenshon kontinuo. Di e manera akí FM Academy ta konbertí su mes den un sentro di formashon i kapasitashon di nivel kualitativamente haltu, ku ta kumpli ku e nesesidatnan di kuido di salú na Boneiru i kresementu di profeshonalnan den kuido na Fundashon Mariadal.
Bo ke sa mas?
Bo ke pidi mas informashon general tokante formashon pa ‘ziekenverzorgende’ i ‘verpleegkundige’, e ora ei bo por tuma kontakto ku sekretariado di FM Academy.
Kontakto
Bo tin pregunta òf bo ke mas informashon? Tuma kontakto ku nos.
Number di telefòn: (+)599 715-8900 ekstenshon 1157
Emailadrès: opleiding@fundashonmariadal.org