Den kuadro di Dia Mundial di Nir, Fundashon Mariadal riba djárason 2 di aprel a organisá un Dia Habrí di e Departamento di Diálisis. E aktividat a tuma lugá na entrada prinsipal di e organisashon i a hala mas ku 100 bishitante for di den komunidat boneriano. Durante e evento bishitantenan por a akudí pa kontròl grátis di salú, entre otro midi preshon di sanger, suku den sanger, peso i un tèst di proteina den urina (un skrinen pa wak si tin daño ku ta kuminsando na nir). Tambe tabatin hopi oportunidat pa drenta den kòmbersashon ku profeshonalnan den kuido tokante salú di nir, estilo di bida i prevenshon.
E tim di kuido di Fundashon Mariadal – ku ta konsistí di enfermera(o)nan di diálisis, un dietista, un botikario, algun asistente di botikario i e nefrólogo – a duna informashon amplio i hopi tep práktiko. E ambiente tabata habrí, informal i informativo.
Loke a hasi e dia akí spesial, tabata ku vários bishitante a tuma akshon mesora relashoná ku nan resultadonan di tèst. Algun na e sitio mes a plania un sita serka nan dòkter di kas. Ku esaki meta di e dia – stimulá konsientisashon i aktua preventivo – a keda lográ klaramente.
Dentro di poko nos ta kompartí algun video kòrtiku riba e kanalnan di medionan sosial di Fundashon Mariadal pa duna un impreshon di e evento.