Awe ta Dia Mundial di Nir, un dia ku mundialmente ta den signo di konsientisashon tokante salú di nir i importansia di prevenshon i detekshon tempran di malesa di nir.
Pa trese e dia akí na un manera èkstra bou di atenshon, departamento di Diálisis di Fundashon Mariadal a bishitá diferente medio di komunikashon. Durante e entrevistanan akí e enfermera- i enfermeronan di diálisis ta kompartí informashon importante tokante malesa di nir, faktornan di riesgo i importansia di un estilo di bida salú.
Banda di esaki Fundashon Mariadal ta invitá komunidat pa un Dia Habrí di Diálisis riba djárason 2 di aprel 2025. E Dia Habrí akí ta tuma lugá na entrada prinsipal di Fundashon Mariadal i e no ta intenshoná solamente pa pashènt, pero pa tur hende ku ke sa mas tokante salú di nir i prevenshon.
Bishitantenan ta haña oportunidat pa:
- Siña mas tokante kuido di nir i e sistema di traha di departamento di Diálisis.
- Bai den kòmbersashon ku enfermera- i enfermeronan di diálisis i un dietista.
- Haña informashon práktiko tokante prevenshon i tratamentu di malesa di nir.
- Laga kontrolá nan preshon di sanger, nan suku den sanger i nan peso.
Dikon atenshon pa salú di nir ta asina importante?
Hopi biaha nan ta deskubrí malesa di nir te den un fase hopi lat, miéntras ku detekshon tempran i un estilo di bida salú por a prevení komplikashonnan grave. Dia Mundial di Nir ta un momentu pa para ketu na esaki i kompartí konosementu, di manera ku hende ta bira mas konsiente di importansia di nir salú.
Dentro di poko ta sigui mas informashon tokante e programa i e aktividatnan durante e Dia Habrí. Tene e kanalnan di komunikashon di Fundashon Mariadal na bista pa mas detaye.