Botika di Fundashon Mariadal temporalmente a adaptá su sistema di traha pa motibu di un interupshon internashonal den e konekshon di Kuido Elektróniko (e-Zorg).
Ta usa e ret akí pa interkambio di dato médiko i resèpt digital entre dunadónan di kuido. Debí na e interupshon na e momentu akí no por prosesá resèpt digital.
Kiko esaki ta nifiká pa pashèntnan?
Pa sòru ku pashèntnan ta keda risibí nan remedi korekto, e siguiente medidanan temporal ta na vigor:
- Na e momentu akí nos ta prosesá solamente resèpt di emergensia.
- E dòkternan di kas ta duna nan pashèntnan un resèpt bai kuné, ku nan tin ku entregá na botika.
- Nos ta supliká pashèntnan pa bin botika direktamente ku nan resèpt di emergensia.
- Nos ta pidi pashèntnan pa nan bin ku un bista general aktualisá di nan remedinan òf ku e remedinan ku nan ta usando aktualmente ora nan bishitá botika.
- Nos ta supliká pashèntnan ku no tin un resèpt di emergensia pa bin bèk na un momentu mas despues, pa evitá aglomerashon i pa sòru ku remedi di emergensia ta keda rápidamente disponibel.
Huntu nos ta salbaguardiá kontinuidat, kalidat i siguridat di kuido.
Nos ta komprendé ku e situashon akí por kousa inkumbiniensia, pero nos ta hasi tur loke ta posibel pa minimalisá e impakto pa nos pashèntnan. Danki na un kolaborashon estrecho ku dòkternan di kas i dunadónan di kuido, nos ta sòru pa remedi di emergensia keda disponibel.
Kuantu tempu e interupshon ta dura?
E interupshon ta internashonal i por dura algun dia. Fundashon Mariadal ta vigilá e situashon minusiosamente i lo informá pashèntnan i dunadónan di kuido tan pronto ku por reanudá e sistema normal di traha. Pa informashon aktualisá nos lo sigui informá boso via prensa. Nos ta sigui hasi esfuerso pa yuda tur hende mas mihó posibel i nos ta apresiá boso komprenshon i koperashon.