Hospitalisashon

Ta importante pa bo prepará bo hospitalisashon bon. P’esei bo tin ku lesa en todo kaso e informashon na ‘Preparashon na kas’ i ‘Planifikashon di bo hospitalisashon’.

Bo ta bai den departamento di Sentebibu? Semper bai ku lo siguiente:

• Pólisa di seguro di malesa.
• Un prueba di legitimashon (sédula)
• Bo karchi di sita.
• Tur remedi ku bo ta usa den e empake korespondiente (e remedinan tambe ku bo no a haña serka dòkter, manera remedi di farmasia).
• Un bista general aktual di e remedinan ku bo ta usa. E bista general di remedi akí ta optenibel na bo botika.
• E informashonnan di kontakto di Thuiszorg (si na kas bo ta hasi uso di esaki kaba).

Mas tantu posibel nos ta stipulá e dia i ora di bo hospitalisashon den konsulta ku bo. Djis promé ku bo hospitalisashon bo ta haña un mensahe definitivo. Bo tin Thuiszorg na kas kaba? E ora ei pone Thuiszorg na altura, ku bo ta drenta hòspital na Fundashon Mariadal i riba ki dia. Bai hòspital ku e informashonnan di kontakto di Thuiszorg tambe.

Por sosodé ku pa motibu di forsa mayor un hospitalisashon planiá no por sigui. Nos ta realisá nos mes ku esaki por ta hopi fèrfelu pa bo. Pa e motibu akí mas rápido posibel nos ta laga bo sa esaki i huntu ku bo nos ta traha un sita.

Ora bo ta den hòspital, hopi biaha bo tin di haber ku vários dunadó di tratamentu, tin ora di diferente spesialismo. E persona ku ta duna bo tratamentu hopi biaha ta un dòkter òf spesialista. E ta bo punto di kontakto i e ta pasa pa papia ku bo tokante bo tratamentu (bishita di dòkter). Un spesialista médiko semper tin e responsabilidat final pa bo tratamentu médiko. E ta bo dunadó di tratamentu prinsipal. Di e enfermera(o) òf e dòkter di departamento bo ta tende ken ta bo dunadó di tratamentu prinsipal. Tin ora esaki ta menshoná riba un bòrchi pegá na bo kama. Naturalmente bo mes tambe por puntra esaki.

Tur dia (ku eksepshon di den wikènt) e dòkter di departamento ta pasa serka bo, huntu ku un ko-asistènt i un enfermera(o). Esaki nos ta yama bishita di dòkter. Tin ora e spesialista médiko tambe ta pasa. E ora ei nan ta papia ku bo tokante kon e tratamentu ta kontinuá.

Pensa adelantá kua ta e preguntanan ku bo ke hasi e dòkter i eventualmente skirbi nan. Sòru pa bo keda den serkania di bo kamber te despues di e bishita, di manera ku bo no ta keda sin topa e dòkter. Na kada departamento e bishitanan ta na oranan fiho.

Banda di e bishita diario di dòkter, tur siman tin un ‘bishita grandi’ di un grupo mas grandi di dòkter i enfermera(o). Nan ta evaluá bo kuido i bo tratamentu. Si bo ke papia ku e dòkter di departamento òf e spesialista médiko na un momentu ku no ta e bishita di dòkter, e ora ei bo por bisa esaki durante e bishita òf bo por bisa e enfermera(o).

Na e departamentonan bo por risibí bishita tur dia entre 11.30 or i 13.00 or i entre 18.30 or i 20.00 or. Si bo ta sinti ku bo no por risibí bishita, e ora ei e enfermera(o) ta notifiká bo persona di kontakto tokante esaki.

Pa trankilidat di e pashèntnan:

• ta mas agradabel si bo no tin bishita di mas ku dos persona pareu. Nos ta apresiá si bo persona di kontakto ta sòru pa bo bishita bini na diferente momentu.
• bo bishita no ta keda mas ku un ora i mei.

Pa motibu di e orarionan di bishita amplio akí, por sosodé ku durante e periodo di bishita un dòkter òf enfermera(o) ta pasa. E ora ei nos ta pidi bo bishita pa warda un ratu pafó di e kamber. Pa sierto departamentonan pa motibunan práktiko tin otro orario di bishita na vigor. E enfermera(o) ta papia ku bo tokante esaki.

Durante bo hospitalisashon regularmente nos empleadonan ta pidi bo nòmber i fecha di nasementu. Esaki no ta pasobra nan no sa ken bo ta, pero pa evitá ku nan ta hasi un kibokashon.

Pa e dòkternan i enfermera(o)nan ta importante pa sa si bo tin doló. Doló no ta solamente fastioso, e por sòru pa problema tambe. Durante bo hospitalisashon regularmente e enfermera(o) ta puntra pa duna bo doló un sifra for di 0 te 10, kaminda 0 ta nifiká ku bo no tin doló i 10 ta e doló di mas fuerte ku bo por tin. Ora bo tin doló, bo por haña remedi pa esaki.

Den un hòspital tin hende interná i tin hende ta traha ku tin bakteria òf vírùs. E bakterianan i vírùsnan akí por kousa infekshon. Nos ta hasi nos máksimo esfuerso pa evitá ku bakteria i vírùs ta pasa over riba otro pashènt. Tin medida di higiena, manera desinfekshon di man ku alkohòl di man, ku tur empleado di hòspital mester tene nan mes na dje.

Tin ora e medidanan general akí no ta sufisiente. E ora ei tin mester di medida spesial di isolashon. Tin un karchi di koló (karchi di isolashon) na bo porta di kamber òf na bo kama. Riba e karchi akí empleadonan di hòspital i bo bishita ta mira kua ta e medidanan ku ta nesesario.

E empleadonan di e departamento ta tene kuenta ku bo privasidat. Nos ta sòru mas tantu posibel pa otronan no mira nada di bo tratamentu. Bo por tene un kòmbersashon ku un dunadó di kuido den un kamber apart na bo departamento.

Ta pèrmití pa hasi yamada ku selular na Fundashon Mariadal, ku eksepshon di den e zonanan kaminda esaki ta kousa interupshon di aparato médiko òf kaminda esaki ta stroba otro hende. Kaminda por drenta e áreanan akí tin bòrchi di prohibishon. Na e departamentonan di kuido bo no tin mag di usa bo telefòn selular. Pa e motibu akí nos ta pidi bo pa paga bo telefòn selular ora bo ta na un departamento di kuido.

Si bo no tin mester di keda drumí na kama, bo por bai otro sitio den hòspital tambe. Sitionan interesante pa bo ta e hal sentral, e terasanan paden òf e Patio Blou. Bo por kana keiru tambe banda di e Kapèl den nos hòspital. Den konsulta ku bo dòkter bo por kana un ratu kòrtiku den nos hardin. Semper bisa e enfermera(o)nan ora bo ta sali for di e departamento. Bisa nan tambe na unda bo ta pensa di bai i ki ora bo ta bini bèk. Esaki pa motibu di saminashon planiá òf bishita di dòkter, famia òf konosí. No laga bo kosnan di balor atras sin bista riba nan. Bai ku nan huntu ku bo òf warda nan den bo kashi di paña ku bo por sera na yabi.

Si bo situashon ta pèrmití, i despues di konsulta ku e dòkter di departamento, vèrlòf den wikènt i riba dianan di fiesta ta posibel. Vèrlòf den wikènt ta dura en prinsipio for di djasabra mainta 9.00 or te djadumingu anochi 20.00 or.

Por sosodé ku durante bo hospitalisashon nan ta traspasá bo pa un otro kamber na e departamento. Mas pronto posibel nos ta laga bo sa esaki. Nos ta pidi bo komprenshon pa esaki.

Bon informashon tokante kiko ta bai pasa ta importante promé, durante i despues di bo hospitalisashon. Pa e motibu akí e dunadónan di kuido ta splika bo kiko ta pasando i kiko ta bai pasa. Mayoria biaha pa sostené esaki bo ta haña material di informashon tambe, di manera ku bo por lesa esaki trankilamente un biaha mas. Esaki por yuda bo pensa aktivamente huntu ku nos i yuda nos tuma desishon tokante bo kuido i tratamentu. Bo tin mas pregunta? Puntra e dòkter òf e enfermera(o). Bo tin mester di yudansa pa komprendé e informashon òf pa tuma desishon? Bisa nos esaki. Semper tin un dunadó di kuido ku por yuda pensa huntu ku bo.

Si bo ta bini Fundashon Mariadal komo pashènt, bishitante òf empleado, naturalmente bo por bini ku algun kos di bo mes. Sinembargo bo mes ta keda responsabel pa manehá bo pertenensianan durante bo estadia den Fundashon Mariadal. Fundashon Mariadal no ta responsabel pa daño, pèrdida òf ladronisia di kualke pertenensia. Pa e motibu akí nos ta konsehá bo fuertemente pa laga bo pertenensianan di balor òf pertenensianan spesial na kas. Solamente si por proba ku ta aktuashon deskuidá di (un empleado di) Fundashon Mariadal a kousa e daño òf pèrdida, bo ta bini na remarke pa un kompensashon di parti di Fundashon Mariadal.

Den esaki Fundashon Mariadal ta tene kuenta ku e suma di kompra i e fecha di kompra di bo pertenensianan.