Si un dòkter di kas a manda bo Fundashon Mariadal, bo ta haña un karta serka bo dòkter di kas. Den e karta akí e dòkter a skirbi ku bo tin ku yama pa traha un sita. Por ta tambe ku bo ta haña un sita bai kuné òf ku nan ta manda esaki na kas pa bo.
Bai poliklínika
Preparashon
Prepará bo bishita na hòspital bon. Skirbi por ehèmpel e preguntanan ku bo ke hasi i kua informashon bo ke duna. Bo tin sierto alergia? Skirbi esaki tambe. Na poliklínika nan ta puntra pa esaki. Lesa tambe nos tepnan pa bo kòmbèrsashon ku e dòkter.
Pa bo bishita na poliklínika bai en todo kaso ku:
Un prueba bálido di identidat (sédula);
Un lista di e remedinan ku bo ta usa. Bo por haña esaki serka bo dòkter di kas òf na botika.
Registrashon
Pa promé biaha bo ta pashènt na Fundashon Mariadal? E ora ei bo tin ku laga nan registrá bo promé. Esaki bo por hasi na Resepshon, pegá ku entrada prinsipal di Fundashon Mariadal.
Si ta pa promé biaha bo ta bin traha un sita serka spesialista, bo tin ku trese e siguiente dokumentunan:
- Un karta di referensia di bo dòkter di kas, kaminda e ta indiká bon kla pa kiko e ta referí bo na e spesialista.
- Bo sédula.
Ku e dos dokumentunan akí bo por mèldu bo mes serka asistènt di e spesialista en kestion pa traha un sita. E ta duna bo bo sita riba un karchi di sita, ku bo mester bini kuné na kada siguiente bishita. Despues ku bo a bishitá e spesialista, e asistènt ta traha kada sita di kontinuashon pa bo. Si ta despues di 6 luna òf mas bo ta bini konsulta atrobe, bo tin ku trese un karta di referensia nobo di bo dòkter di kas.
Bo tabata anteriormente na Fundashon Mariadal kaba, pero bo informashonnan a kambia? E ora ei duna e asistènt di ora di konsulta e kambionan akí.
Bo tin un number di telefòn selular òf un emailadrès nobo? Dun’é esakinan tambe.
Paga tinu: pa traha un sita bo tin ku pasa personalmente serka e asistènt òf bo por pidi un hende pa hasi esaki pa bo. No ta traha sita via telefòn.
Tempu di espera
Kada spesialista tin un tempu di espera, i su asistènt ta na altura di esaki. Esaki ta nifiká pues ku no ta tur ora bo por akudí mesora pa tratamentu òf saminashon. Den e kasonan kaminda e situashon ta urgente òf bo bida ta na peliger, den konsulta ku e spesialista ta traha un sita mesora pa bo.
Strobá
Si bo ta strobá i no por bini mas, bo tin ku mèldu esaki pa mas tardá 24 ora adelantá. Bo por hasi esaki personalmente serka e asistènt òf via telefòn.
Kon kosnan ta bai durante bo bishita
Mèldu
Bo ta mèldu bo mes na e ora palabrá serka e asistènt na poliklínika. E ta kontrolá si bo informashonnan ta bon den fail. Despues bo ta bai sinta den sala di espera.
Bishita na spesialista
A base di un kòmbersashon i/òf un saminashon na bo kurpa e spesialista ta purba haña sa kiko ta kousa di bo kehonan. Durante e promé bishita na spesialista, huntu ku bo e lo hinka un plan di saminashon òf di tratamentu den otro. Tres pregunta importante ku bo por hasi bo dòkter na e okashon akí ta:
- Kua ta e opshonnan (pa tratamentu) ku mi tin.
- Kua ta e resultadonan ku mi por verwagt.
- Kua ta e riesgonan pa mi.
Hasi bo dòkter e preguntanan akí libremente. Bo tin mester di e informashon akí pa bo por hasi un bon eskoho.
Kon ta sigui awor?
Ta dependé di bo kehonan kon kontinuashon di bo bishita lo ta. Tin algun posibilidat:
- E spesialista ta preskribí un tratamentu òf remedi.
- Bo dòkter ta referí bo pa mas saminashon (prek sanger, radiografia etc.).
- Bo dòkter ta referí bo pa un otro spesialista òf dunadó di kuido.
- Bo dòkter ta konsehá hospitalisashon.
- Bo no tin mester di bin hòspital bèk.
Bo spesialista ta papia tokante esaki ku bo.
Algun tep pa bo kòmbersashon ku e dòkter
Promé ku bo bai hòspital, ta konsehabel pa prepará bo bishita serka e dòkter bon. Finalmente t’abo mes – den konsulta ku bo dòkter – ta disidí tokante bo tratamentu. Bo por skirbi adelantá kua ta e preguntanan ku bo ke hasi i kua informashon bo ke duna. Akí bou tin algun tep i pregunta.
Promé ku e kòmbersashon
- Sòru pa bo sa ku kua dòkter bo ta bai papia.
- Sòru pa bo sa meta di bo kòmbersashon ku e dòkter.
- Sòru pa bo sa kiko bo ke konta.
- Prepará e preguntanan ku bo tin.
- Sòru pa bo sa kua ta e remedinan ku bo ta usa.
Informashon ku bo ta deseá di haña
Sòru pa bo haña informashon tokante:
- kiko e dòkter ta pensa ku bo tin (e diagnósis)
- e saminashon i/òf e tratamentu ku e dòkter ke bai hasi
- meta di e saminashon i/òf e tratamentu
- e konsekuensianan i e riesgonan di e saminashon i/òf tratamentu
- otro saminashonnan i/òf tratamentunan ku ta bini na remarke i e konsekuensianan i riesgonan di esakinan
- ki dia i kon bo ta haña tende resultado di e saminashon i/òf tratamentu
- kiko bo tin ku hasi òf kiko yùist bo no mester hasi promé ku e saminashon i/òf e tratamentu
- ki dia e saminashon i/òf e tratamentu lo tuma lugá (tempu di espera) i kon largu e saminashon i/òf tratamentu lo dura
- e remedinan ku eventualmente bo tin ku bebe i kiko e efektonan sekundario di esakinan lo por ta
- bo perspektivanan (e pronóstiko)
- kiko bo (no) tin mag di hasi despues di e saminashon i/òf tratamentu i kon bo lo sinti bo mes
- kua gastu bo mes tin ku paga
- kiko ta pasa si bo no laga saminá i/òf trata bo
Pèrmit
- Sòru pa bo tin sufisiente tempu pa pensa tokante e saminashon i/òf e tratamentu ku nan a proponé.
- Disidí si bo ta duna pèrmit pa un saminashon i/òf tratamentu i pone e dòkter na altura di e desishon akí.
- Pidi pa foyeto ku eventualmente ta presente (por ehèmpel tokante e saminashon i/òf e tratamentu, tokante e malesa òf tokante bo derechonan komo pashènt).