Fundashon Mariadal
Fundashon Mariadal ta un instituto di kuido di salú na Boneiru, bou di kua e siguiente áreanan di atenshon ta kai: kuido agudo, kuido di durashon kòrtiku, kuido di durashon largu, diagnóstika i suministro di remedi.
For di aña 2010 Boneiru ta un munisipio spesial di Hulanda. For di e tempu ei e poblashon a krese konsiderabelmente i e espektativa ta ku e kresementu akí ta kontinuá den e añanan binidero. Konsekuensia di esaki ta ku Fundashon Mariadal lo krese huntu ku e poblashon.
Esaki ta nifiká ku nos ta bai duna mas kuido i kuido mas amplio. Pa e motibu akí Fundashon Mariadal a invertí fuertemente den upgrading di nos personal i e diferente departamentonan di kuido. Nos tin e ambishon pa ofresé 80% di kuido akí na Boneiru mes. Pero pa logra nos meta nos tin mester di mas profeshonal. Huntu ku tur nos empleadonan nos ta duna un aporte na un mihó kuido kualitativo na nos isla.
Mishon
“Fundashon Mariadal lo brinda tur hende na Boneiru kuido médiko transmural profeshonal i optimal. Pa medio di kolaborashon integrá entre kuido general i kuido spesialisá nos aspirashon ta pa yega na fasilidatnan di kuido ku ta sinkronisá ku otro. E kolaborashon akí ta enfoká prinsipalmente riba e islanan i paisnan rònt di nos, serka kua nos ta obligá di buska sosten. Normanan internashonal pa kuido di salú, adaptá na e situashon di Boneiru, ta para dilanti i lo determiná e direkshon.”
Vishon
“Tur hende tin derecho riba e kuido máksimo, integral i kualitativo ku por logra na Boneiru i ku ta sinkronisá ku e nesesidatnan i deseonan di e pashènt i su famia. Komo empresa mas grandi ku ta duna servisio den kuido di salú na nos isla, Fundashon Mariadal tin e tarea pa kontinuamente garantisá kuido di salú i sòru pa su personal por disponé di e konosementu, abilidatnan i medionan ku ta nesesario pa esaki.”
Historia
Lantamentu di e hòspital a tuma lugá na aña 1922, ora ku sùrnan di Roosendaal a kumpra un vila ku e tereno rònt di dje, pa realisá un hòspital. E hòspital akí a haña e nòmber ‘Hòspital San Fransisco’. Práktikamente den e mesun aña e sùrnan a konstruí un konbento riba e tereno rònt di e hòspital. Sinembargo algun aña despues ya kaba e hòspital a resultá di ta muchu chikitu i nan a konstruí un hòspital nobo. Serka e hòspital akí nan a konstruí tambe un dependensia pa hende grandi. Finalmente e demanda pa kuido di hende grandi a oumentá di tal manera, ku e hòspital tabata duna alohamentu na mas i mas hende grandi.
Pa tene kuido di hende grandi i kuido di hende malu separá for di otro, un biaha mas a konstruí un hòspital nobo. E hòspital bieu a kambia bira un kas pa hende grandi i a haña e nòmber ‘Kas di Sosiego’. E hòspital nobo a keda kla na aña 1976 i te ainda e ta den uso. Kuido di salú na Boneiru, ku un tempu a kuminsá ku dos sùr den e vila, den añanan setenta a bin kai bou di e fundashon ku nan a lanta pa esaki: ‘Stichting ziekenverpleging & bejaardenzorg – Fundashon kuido pa hende malu i kuido pa hende grandi’. Na aña 1999 nan a kambia e nòmber akí pa ‘Fundashon Mariadal’, o sea ‘Stichting Mariadal’, ku ta nòmber di e konbento for di kua ántes nan tabata manda sùr pa Boneiru.
Awendia e vila ta den uso pa e sentro di salú ‘Sentro di Salú convent’ i banda di esaki e ta fungi komo ofisina pa management i atministrashon di Fundashon Mariadal. Na aña 2003 un kas di kuido nobo a keda kla. Den e edifisio akí, esta ‘Kas di Kuido’, nan ta duna kuido na klientenan ku tin mas nesesidat di kuido.
Informashon di kontakto
Adrès:
Kaya Soeur Bartola
Kralendijk
Boneiru, Hulanda Karibense
Tel.:
Email: